2018 ~ ZOFEST

Sunday, December 16, 2018

AMSU IN ZOFEST AN HMUH DAN

ZOFEST rawn hmang All Manipur Students' Union (AMSU) Report:

AMSU hruaitu te leh MZP Hruaitu te

North East Students' Organisation (NESO) a kan thawhpui AMSU hruaitute chuan Zofest nuam an tih thu leh mizo te fel zia te, hmeichhia zawng zawng an hmelthat thu leh Kanlo duat zia hlir an sawi bang theilo a.. a lawmawm takzet ani. Tin Manipur ah Zohnahthlak tamtak an awm a, chung ho chu anni AMSU hian Zofest atang hian an hmuh dan a dang nghal hle tih an awmdan leh thusawi atangin a hriat bawk a..CHURACHANPUR mizo te kiangah an haw tekha Pathian remruat ani lo theilo.. Manipur a Zirlai pawl lian leh thil tithei ber, manipur neitu AMSU leh Manipur a Zofate relationship thar duhawm tak Zofest hian a hring chhuak dawn niin a lang.

Tin, AMSU hian Zofest kan buatsaih dan chu tha an ti takzet tih sawiin In an thlen hunah Zofest kan neih ang hi Meitei hnam hrang hrang tan an Siam ve tur thu sawiin Zofest in ngaihtuahna thar tamtak an pek thu leh an rawn kal ve chu An inchhir loh thu te, thil thar tamtak inzir na tur an hmuhchhuah thu an sawi a ni. Mzp in Zofest chim tura kan sawm khan Mizoram chu a mawi in a nuam dawn a, MZP te sawmna pawh harsa tilo takin kan pawm nghal ani a, mahse kan rawn thleng ta cheng a, kan lo suangtuah na zawng zawng let 1000 in mizoram chu a lo mawi a, a chhunga cheng te lah in tha in mikhual in duat em em bawk ai.. Zofest kan lo kal hi 1000% in kan inchhir lo a, kan lungawi hliah hliah ani tiin an sawi a ni.

By:

Ricky Lalbiakmawia, NESO Fin. Secretary

ZOFEST A PRESIDENT THUSAWI TLANGPUI

Tv. L.Ramdinliana Renthlei, President Mizo Zirlai Pawl GHQ

Mizoram, kan ram kan humhalh duh avangin MZP chuan hma kan la a, Assam leh Mizoram inrina bul Mizoram chhung Bairabi Zophai hmunah Zofate Chawlhbuk kan sa a, thiahsak kan ni a. Sak leh kan tum a Assam Police lamin an phal ta lo a, MZP member te chu Silai a kah kan ni a, nasa taka vuak kan ni bawk a, khatih hunlai khan MZP chuan chhantu a ngai a, MZP kha a rum a, MZP khan chhantu a neih loh avangin a mittui a tla a, MZP kha a tap a ni. Pathian tal hi kan au ei tur a ni tiin Pathian hnenah kan tawngtai a, kan tawngtaina chhan in a awm ta a, kan tawngtaina chhanna a Pathianin min pek chu vawiina khawvel hmun hrang hrang atanga kan unau, kan thisen zawmpui ZOFEST lo hmang tute hi in ni. Vawiina ZOFEST palai kan unau, kan thisen zawmpui te hi MZP tana Pathian pek te in ni a, in chungah hian MZP hi kan va lawm em ve aw.......

MZP a mangang lai taka kan tana lo au chhuaktu awm chhun te in ni a, Assam Police in Silai a MZP te min kah chungchangah thlamuanna thu leh MZP puih a ngaih a puih in in huam thu thuchhuah leh lehkhathawn thahnem tak kan hmu a, MZP chu a hahdam phah sawng sawng a, nangmahni avangin MZP chu a thla a muang a ni. Zofe chipeng thenkhat te hi chuan Hnam tana thawktu Silai keng/hnam tana pasaltha te kan nei a, kan unau Silai keng te khan min lo bia a kan inpeih reng e, MZP chhan tur hian kan Silai kan thawh thei a, in kap thiam lo a nih pawhin Sipai a kap thiam kan intum thei a, MZP in min mamawh phawt chuan Silai kengin kan lo kal ang an lo ti a MZP chuan kan thlamuanpui hle a ni. MZP a mittui tlak lai, MZP a tah lai leh MZP a mangan laia min thlamuantu, MZP thlavang hauhtu khawvel hmun hrang hranga awm kan unau, kan thisen zawmpui te u MZP chuan a theihnghilh ngai dawn lo che u a, harsatna in tawk emaw buaina in nei a nih chuan kan unau, kan thisen zawmpui tan chuan MZP chuan hma a hruaiin, in tan kan ding tlat zel dawn a ni.

ZOFEST hmasaber hi kum 2002 May 28-30 khan Churachanpur, Manipur-ah neih a ni a. Young Paite Hall, Lamka hmunah hlim tak leh inpawh tlang takin hun hman a ni. ZOFEST hmasaber tawp zanah chuan MZP hruaitute leh Zofa hnampual pawl hrang hrang hruaitute chu nghet taka kut insuiha dingkualin, ‘Insuihkhawm leh zai I rel ang u’ – Capt L.Z.Sailo phuah chu mittui tla zawih zawih a sa in tin ta a ni.

ZOFEST hi Zoram hmun hrang hrangah hman a lo ni tawh thin a, Manipur ah te, Tripura ah te, Assam ah te Mizoram state pawnah chuan hman a lo ni tawh a, Mizoram chhungah hian vawi 4(Li) hman a ni tawh bawk a kumin hi vawi 8(riat) kan hman na tur a ni.

ZOFEST hi Mizoram state pawnah hman a nih apiang hian harsatna/dodalna a awm ziah thin a, kum 2002 ZOFEST hmasa ber-ah pawh khan kan unau thenkhat atangin dodalna a awm a, kan hruaitu hmasa te khan nasa taka beiin hel leh ralthuam/Silai mu karah unau kan nih zia pholan nan huaisen taka an lo beih avangin hlawhtling takin hman a ni. 2012 kuma Darchawi Tripura a hman a nih khan ZOFEST hian dodalna a tawk nasa hle bawk a, kan unaute zingah ZOFEST dodaltu pawl an lo awm a, kawng te an zawh a ZOFEST hi boycott tum pawl pawh an awm a, mahse Pathian puihna in tluang takin hman a ni leh a ni. Tin, 2015 khan ZOFEST hi Halflong Assam-ah hman a ni leh a, hetah pawh hian engkim peih fel a, kawng a kan kal laiin kan unaute tho hel ten min tibuai leh a, kum 2015 kum khan nikhat phei chu ZOFEST hi kan hmang thei lo nghe nghe a ni. Ni 3 Programme tur kha ni 2 kan hman phah tawh bawk a mahse Pathian puihna in kum 2015 kum pawh khan hlim takin ZOFEST kha hmanzui a ni ta a ni. Harsatna leh buaina tamtak karah ZOFEST hi hman a lo ni tawh thin a, mahse Pathian puihna in kan tum ang zelin hlim takin kan la hmang thei zel a ni. Vawiina ka sawi duh chu MZP in Zo-Hnam inkhawmpui lian kan buatsaih thin ZOFEST hi Pathian programme/Pathian hriatpui a ni tih a chiang hle a ni. Pathian hian Zofate hi min hmangaiha insuihkhawm a kan awm theih nan min pui zel dawn a ni tih hi a chiang hle a ni.

MZP chuan Zofa chi peng hrang hrangte kan insuihkhawm a, lungrual taka kan awmho theih hun hi nghakhlel takin a thlir thin a. Zofa chi peng hrang hrangte lungrual taka kan insuihkhawm theih nan MZP chuan nasa taka hma la thinin Zofate kan insuihkhawm theih nana inkhawmpui lian ber ZOFEST chu buatsaih thin a ni. ZOFEST hi buatsaih chhunzawm zel pawh a tum a ni.

Zofate hi khawvel hmun hrang hrangah kan awm a, a then chu India ah kan awm a, a then chu Myanmar ah kan awm a, a then chu Bangladesh ah te leh khawvel hmun hrang hrangah kan awm a ni. Khawvelah hian Zofate hi nuai 60 chuang kan awm a ni. Min awmbettu ten ramri min siamsak mah se la, ram chuan ri a nei a, hnam erawh chuan ri a nei lo a ni. Min awpbet tu ten kan duhdan ni hauh loin ramri min kham sak a, International boundary-in dai min dan avangin leh ramri an kham avangin Zofate chu rorelna pakhat hnuaiah awm vek lo mah ila, rilru leh thinlung lamah inpumkhat takin kan awm thei a ni tih hria in MZP chuan ZOFEST a buatsaih thin a. Ramri leh khawsak phung lo dang ta avanga mahni unau, mahni chi pui te ngei pawh inhre tawn tawh lo te, unau hmelhai a lo awm tawh te huikhawm a thlahkhat unau kan nih zia leh thisen inzawm kan nihzia hriattir hi ZOFEST thil tum bulpui ber chu a ni.

Eng tik ni ah emaw chuan hmun hrang hrang a Zofate hi rorelna pakhat hnuaiah kan la awmkhawm dawn a, a awmzia chu Independent kan ni anga ramri in min daidan tawh loin ram khatah kan la awm dawn a, hei hi MZP te chuan kan beisei leh kan rin a la ni reng a ni. Zofate hi mi awpbehna hnuaiah kan awm reng dawn lo a ni. Hmun hrang hrang a Zofate hian kan awmna hmunah theuh hnam inpumkhatna nei turin hma kan la tur a ni a, kan awmna hmun theuh ah ram leh hnam hmangaihna rilru pu tlat chungin rinawm taka kan awm a ngai a ni.

Tawng a in an loh avanga unau hmel kan in hai thin hi MZP chuan pawi a ti a, Zo tawng hi lo la piang tur a ni a, Zofa chipeng hrang hrang tawng hi a mawi hlawm hle a, a vaia infin khawm hi Zo tawng vek a ni. Chuvangin Zofa zawng zawng te rilru zau tak pu chung leh in duhsak tawn tak chunga kan awmho a ngai takzet a ni.

MZP chu a tul ang apiangin hmun hrang hrang a Zofaten min mamawh ang zelin leh an thlavang hauh turin a che chhuak zel dawn a ni. Kil tina Zofa zawng zawngte kan insuihkhawm theih nan mimal tinin mawhphurhna kan nei theuh a, kan mawhphurhna hlen tura kan theihna zawn theuh a hma lak zel hi kan insuihkhawm theih nana kawng pawimawh tak a ni. Zofate hi tam kan duh vang a in sawmkhawm chawp ni lovin, chung Pathian ruatsa, Thisena inzawm, Unau thlah khat kan nih avangin kan insuihkhawm a tul a, Zofa hmun hrang hrang a awm te kan in pumkhat that chuan khawvel a hnam zahawm tak kan ni dawn a ni. Zofate hi kan inpumkhat loh chuan hnam boral kan ni mai dawn a, Zofate kan din khawchhuah nan kan insuihkhawm a ngai a, insuihkhawm leh zai i rel ang u.

ZOFEST PRESS RELEASE 3

ZOFEST HMAN CHHUNZAWM ZEL A NI

PRESS RELEASE

Vawiin 7th December, 2018 (Zirtawpni) hian Zofest a ni thum nan Reiek a Zofest pandal, "Zo Inpui"-ah hman chhunzawm a ni a. Pu B.Vanlaltana Vice President MZP chuan inkhawm a kaihruai a. Pi Ebenezer Siami, MP Myanmar chuan khuallian niin a hmanpui a, Pu C.L Ruala MP (Lok Sabha) chuan Uaptu niin a hmanpui bawk.

Pi Ebenezer Siami

Pu L. Ramdinliana Renthlei, MZP President chuan thu a sawi a, "Kan ram Mizoram humhalh duh avangin MZP chuan hma kan lo la a, Zophai a kan chawlhbuk sak chu thiah sak kan nih tum khan, MZP member te silaia kah leh vuak kan ni. Khatih hun lai khan MZP chuan chhantu ngaiin a tap a, sorkar kan au a, chhanna kan hmuh tak lohah chuan Pathian tal kan au ei tur a ni tiin kan tawngtai ta a, chu kan tawngtai chhanna chu vawiina hmun hrang hrang atanga zo hnahthlak lo kal khawm Zofest hmangtute hi in ni. Kan thisen zawmpui Pathian min pekte in ni a, in chungah MZP a lawm tak meuh meuh a, min thlawpna thu in chhuahte hi kan la theihnghilh lo a ni" a ti a.

Zophai chungchangah MZP kan tap a, sorkar kan auh eih theih loh laia kan tana au chhuaktute, puih leh tanpui kan ngaih hunlai leh kan tah hunlaia kan tana awmchhunte in ni. MZP thlavang hauhtute MZP chuan a theihnghilh ngai dawn lo cheu a, in mangan hun apiangah MZP hi in tan kan awm dawn a, in hmaah in tan kan ding tlat zel dawn a ni a ti bawk.

MZP President chuan, "Zofest hmasa ber hi Manipurah 2002 khan hman a ni a, tun hi a tum 8-na a ni a, vawiin ni thlenga kan la hmang thei zel hi a lawmawm hle a ni. Mizoram pawna kan hman changin dodalna naša tak hnuaiah kan hman chang pawhin unau kan nihna pholana a awm hram hram thin hi a lawmawmna tizualtu a ni. Pathian hruaina naša tak tunthlengin zofate hian kan dawng zel a ni" a ti bawk.

MZP chuan zofa chi peng hrang hrangte insuihkhawm a, thisen zawm unau diktak kan nihzia in hrilhhriat zel hi Zofest tum ber a ni a, International boundary in min daidang mahse, hnam hian ramri a nei ve lova, mahni thisen zawmpui inhai tate huikhawm a, thlahkhat kan nihzia inhriattir hi MZP leh Zofet tum ber a ni.

Engtikniah emaw chuan Zofa hmun hrang hranga awmte hi rorelna pakhatah kan la awm dawn a,heihi MZP beisei a ni.

Tawng a in an loh avangin unau kan nilo tihna a ni lova,kan tawng hrang hrangte hi avaiin a mawi em em vek a ni.

MZP chuan atul ang zelin zofa hmun hrang hranga awmte tan a dingin a awm dawn a,kan insuihkhawm theih nan hma kan la zel dawn a ni, Pu L.Ramdinliana Renthei chuan a ti.

He huna thu sawitu , Khaullian Pi Siamtei MP Myanmar chuan, "International boundary zawng a ngaituah chuan ram hran daih ni mah ila, ka inpui ngeia thu ka sawi thei hi ka lawm hle a ni, hei hian Ramin ri a nei a, Hnam chuan Ri a nei lo tih a entir a ni. Kei ni Zofate hi kan chenna sawrkar ten 'Chin-Kuki- -Mizo' tiim min chhinchhiaha mahse chhinlung chhuak thlahtu hmun khat chhulkhat kual, unau piang hmun kan ni a, Zofate kan chenna a pianv hi kan RAM a ni. Ram thendarh hrang hrangah Cheng mah ila unau kan nihna a bo lo a, thlang tla hmasa leh hnuhnung kan awm mai zawk a ni." a ti.

Khhuallian chuan sawi chhunzawmin " 1970 hnu lam atang Khan B gvurma RAM chu economics ah naša takin a tlachhia a, Chin mite Mizoram a ei keh bar zawnga lo tla thlate Mizo mipui ten duat tak leh dawhthei takin unau kan nih hre rengin in lo enkawla kan lawm hke a ni. Kan chenna sawrkar leh sawrkar i karah i hmuhthiamlohna a thleng keh thin a, a la awm zel thei bawk a ni, amaherawh chu hengte hian kan inunauna ti chhe lo sela, Zofate kan inunauna hi engmahin a tih chhiat kan phal lova, kan inunauna leh inpumkhatna a lo ngheh zual deuh deuh theih nan i thawh ho zel ang u. Zofest 'Hmangaihna khawmpui' kan neih leh tur hi khawchhak Zofate chenna ngei Burma ramah hlim takin kan zaa kan hman ho tbeih ngei ka beisei tlat a ni." a ti.

Uaptu Pu C.L.Ruala MP chuan, Zofest hian rah duhawm tak chhuahse a duh thu a sawi a. "Zofate kan insuihkhawm hun a nghahhlelhawm takzet a ni. Kan awmna apiangah rinawm takin hna thawk ila, kan chenna apiangah mi timangangtu niloin, mite tanpuitu i ni zel ang u" a ti bawk.

Vawiin Zofest-ah hian Zofate khawvel hriata min ti hmingtha tu; Nl. Lalremsiami Hockey Player leh Tv Jeremy Lalrinnunga Weight Lifter te bakah Zofest lo pianchhuah theih nana thawhhlawk em em Pu Lalthuthlungliana Ex-President Manipur MZP te chawimawina thuziak hlan an ni.

Zofest 2018 Mister and Miss

Kumin Zofest-ah hian Miss leh Mister thlanna neih nghal a ni a, Zofest 2018 Miss atan Mai May Thang Pai, Chin Students Union, Myanmar leh Mister atan James Molsom, Tripura te thlan an ni.

Zanin hian Zofest palai thlahna hun hman leh tur a ni a, Dr. Kyi Moet Moet Lwin MP Myanmar chuan uaptu niin a hmanpui ang.

Sd/-

(LALNUNMAWIA PAUTU)

General Secretary

MZP General Headquarters

ZOFEST PRESS RELEASE 2

ZOFEST A NI HNIHNA- CULTURAL DAY

Pu Cross Remliana Pangkhua

Vawin ni 6th December, 2018 chhun dar 10:30 khan Reiek khuaa Zofest hman mek chu chhunzawm niin, Zokhua Reiek hmunah Cultural Day hman a ni. He hun hi Pu Andrew F. Lalramnghaka, Finance Secretary, M.Z.P chuan kaihhruaiin, Pu Cross Remliana, Councellor, Rangamati Hills District Council Bangladesh chuan khuallian niin a hmanpui a. Pu R.K. Thanga, MUP President leh Pu James Lalchhuanawma President Mizo Cultural Organisation General Headquarters ten thu an sawi bawk.

Pu James Lalchhuanawma chuan, "MZP ten chhim leh hmar chhak thlang atanga unau chhulkhat kual intawh khawmna hun MZP ten an buatsaih thei hi an fakawmin Mizoram Cultural Organisation chuan lawmawm a ti a. Mizo te hi Pathian in hnamah min siam a, tlang hrang hrang leh hmun hran hranah awm mah ila unau kan nihna leh chhulkhatkual kan nihna kan hnam kal phung hi vawngnung zel ila. Kan hnam hian hma asawn a hnam ropui kan nih theihna turin MZP hmalakna MCO chuan a thlawp zel dawn a ni." a ti a. MCO hian MZP hmalakna chhuanawm antih zia lan tir nan thu ziak an hlan bawk.

M.U.P President Pu R.K Thanga chuan, "Zofate hi kan duh vang renga thendarh kan nilo a. Khawvel hmun hrang hrangah Zofate hi kan cheng a ni. Pathian in hun tha min pe anga, engtik ni ah emaw chuan rorelna pakhat hnuaiah kan la awm ang tih hi MUP chuan a ring tlat a. Chu tiang a thlen theihna tur chuan Zohnahthlak hnam peng hrang hrang te hi inla hrang lo ila. Unau kan nihna hi pawm tlang ila. Zohnahthlak hnam tawng hrang hrang erawh indipdal sak lo ila. Chu chuan hnam ropui takah min hlang kai dawn a ni.

Zofate hi Myanmar, Manipur, Assam, Tripura leh Bangladesh ah hian zohnahthlak tam tak kan awm a. Heng barhluih ramri te hi kan inpumkhat hunah a tul angin kan la thiat dawn a ni. Zofate hi kan awmna hmun theuhah rinawmna leh huaisenna nen unau kan nihna pawm tlat a MZP ten "insuihkhawm zai i rel ang u" ti a an hmalakna hi i thlawp tlat ang u." tiin, Zofest palai zawng zawngte a chah a ni.

Miss May Mai Thang Pai

Khuallian Pu Cross Remliana chuan thu sawiin, Mizoram chhung atang ngeia Zofate insuihkhawn theih nana nasa taka hetiang a Zofest buatsaih a ni hi lawmawm a tih thu a sawi a.

"Vawiinah Zofate hi ram hrang hrangah khawsa in cheng darh mai ila, hnam khata siam chawp, phuahchawp kan ni lova. Pathianin duhtaka a siam chhulkhat kual kan ni a, engemaw chhuanlam hmanga then hran theih kan ni lo hrim hrim a ni" a ti bawk.

Ram pathum- India, Myanmar leh Bangladesh a cheng Zofate hi hun lo kal zel turah hian Pathianin rorelna pakhat hnuaiah a la chhungkhawm ngei a rin thu a sawi a, "Zofate kan khawsakna hmunah theuh hnam nunphung, chin dan leh sakhuana i vawnghim zel ang u" tiin palaite a chah.

Cultural programme-ah hian Mizo hnam lam chi hrang hrang leh zaithiam hrang hrang te zai ngaitha a hun hman a ni.

Zofest hi zaninah leh naktuk lamah hman chhunzawm zel tur a ni a, palai hi Myanmar, Bangladesh leh India state hrang hrang hrang atangin an kal tha hle a, an la thlen belh ve reng bakah, mi thahnem takin Aizawl leh Reiek leh a chhehvel atangin lehlangin an chhim reng bawk.

Sd/-

(LALNUNMAWIA PAUTU)

General Secretary

MZP General Secretary

ZOFEST PRESS RELEASE 1

MIZO ZIRLAI PAWL BUATSAIH MIZO HNAM KHAWMPUI LIAN ZOFEST TAN A NI

Zo Inpui, Reiek

Mizo Zirlai Pawl,(MZP) General Headquarters-in kum 2 dana a lo buatsaih thin khawvel hmun hrang hranga Zofate inkhawmpui lian chu Ni 4th December, 2018 zan khan "Zo Inpui" Reiek, Mamit District-ah tan a ni a. Zofest zan hmasa ber chu Palai in lawmna hun a hman a ni a, he hun hi Tv. H. Lalthianghlima, Asst. Secretary chuan kaihruaiin, Pu F. Lalnienga, Adviser, MZP chuan Zofest thupui 'Unau Kan Ni' tih thupui hmangin thu a sawi bawk.

Heng bakah hian Zofest, 2018 Organising Secretary Tv. Michael Lalramsanga, Treasurer MZP chuan Zofest report a pe a. Pu Vanlalchhunga, VCP Reiek chuan Zofest palai zawng zawng lawmna thu sawiin, palai zingah Molsom, Kaihpeng leh Hrangkhawl aiawh ten an mahni tawngin chibai bukna thu an sawi bawk. Hun dangah pawh a tahtawlin hnam chi peng hrang hrang ten chibaibukna an sawi dawn a ni.

A zan khatna palai lawmna inkhawmah hian Pu B. Vanlaltana, Vice President chuan, "Zofest palai hmun hrang hranga lo kalte chu MZP chuan thinlung takin a lo lawm thu leh he inkhawmpui hian kan in unauna ti nghetzualtu lo ni zel turin palaite ka ngen a che u" tiin, palai lawmna leh fuihna tawi a sawi bawk.

Pu F. Lalnienga, Adviser, MZP chuan, " MZP chuan kan tum ber leh pawl hmalakna a kan ngaihpawimawh berte zingah chuan Zofa hnam hrang hrang inpumkhatna leh unau kan nihna lam hawi zawnga hmalak hi a ni a. Zofest hi MZP ten kan hman tirh atanga chhutin tun a kan thlen chin hian unau kan nihna nasa takin hma kan sawn tih hai rual a ni lo a. Engtik niah emaw chuan Zofate hi hmunkhatah kan la awm anga, rorelna pakhat hnuaiah kan la awm ngei dawn a ni. Unau hmelhai avang leh kan nihna kan hailuih tlat chuan kan hnam hian boralna a hmachhawn ang tih hi MZP chuan a hlau hle a. Chuvang hnam in pumkhatna hi MZP chuan a ngaipawimawh a. Sum leh tha leh zung tam tak sengin, vawin Niah pawh Zofest thupui a tan "Unau kan ni" tih thupui ah kan hmang a. Palai zawng zawngte hian Zofate zawng zawng hi unau kan ni tih pawm a. Mahni khua leh vengah theuh kan haw hunah pawh Unau kan ni tih hi i pawm zel ang u." tiin, palai zawng zawng a chah a ni.

Zofest palai tun dinhmuna in report chu 700 chuang an ni tawh a. Palai hi Myanmar, Bangladesh, Manipur, Tripura, Arunachal Pradesh, Assam leh Mizoram chhung hmun hrang hrang atangin an kalkhawm a, kawng laka thang mek an awm nual bawk a ni.

Naktuk dar 10:00 am hian vantlang inkhawm a awm leh ang a, Dr. C.Vanlalramsanga I.E.S Secretary to the Govt. of Mizoram chuan khuallian niin a hmanpui ang a, chawhnu lamah Seminar a hun hman tur niin Dr. C.Lalawmpuia Vanchiau paper buatsaih zirho tur a ni ang.

Sd/-

(LALNUNMAWIA PAUTU)

General Secretary

ZOFEST 2018 | REIEK Dec 5

ZOFEST LEH ANTHURIUM FEST. KHAIKHINNA

Reiek khua ah hian Anthurium festival hi tum engemawzah nghah alo ni tawh a, khawtlang mipui te bakah; police leh Traffic lam te nena kan tanho viau pawhin zurui buaina siam leh mawilo taka khawsa khap senloh hmuhtur antam thin hle ani.

Tin, Stall thalai deuh chu vengdang chan ani tlangpuia, a khaw mipui tamzawk te tan han hnemhnanpui tur a awm hranlo bawk a, kalhun hrelo; hawhun pawh hre chuanglo leh zanreh thleng thlenga kuk ruih ruih thawm atam thin hle bawk.

Henghi thu hran lonita se, Anthurium festival hi kut phuahchawp leh hlutna danglam tak nei ani hranlova, a chingtute lah a khaw mi leh sa pawh anni chuanglo. Milian lntawllenna kut' ani deuh Ber maiin ka hria.

A vawikhatna atan Zofest kuminah kan han thleng leh a, hei zet hi chuan lairil a fan takzet ani. Zohnahthlak unau Duhlian tawng' hmang velo te'n , a hmun ngeiah min rawn thlenchilh chiah chuan , tunhma a kan hmuh mizo ve manglohna rilru kha min phehthlaksak Chiang hle mai. Kan chibil lam theuh te kan entir chuan unau kannihzia leh thlahtu thuhmun kannihna min phochhuahsaka hnukte pawh a ulh thei hial ani.

Zu in avanga buaina siam hmuhtur an awmlova, an inlo lah ani heklo. an khawtual mi tlemte in Traffic leh security hna an vawn kawp pawhin , Tlang hrang unaute leh Tualchhunga chengte'n Zonunzemawi an chhuah tlat mai si a, security tan pawh a thawventhlak huai ang le. MZP hian Zohnahthlak te inpumkhatna tur hian tha leh zung ' alo va seng nasa tak em.

Sawi tur tamtak karah ka sawi tel hram duh chu heihi ani. ka tawnhriat atangin Duhlian Tawng hmanglo unaute hian; Duhlian Tawng pai deuh leh awn deuh pawhin lo hmang mahse, Mizotawngin atawnga, ka unaute anni' tih hi ihrethar leh ang u khai.

Inpui nghaktu kannih hi intheihnghilhlo ila, kan unau Hmunhran Ramhrana awm te i lawm in i thlahlel ang u. Inpuinghak tlak ni Turin theihtawp chhuahtlan zel tum ila,

"INSUIHKHAWM LEH ZAI I REL ANG U".

Sanglura

Reiek Pa.