ZOFEST SOUVENIR

Zofest buatsaih a nih hian Souvenir (magazine) hi tihmakmawhah ngaiin, a buatsaihtu te hian an lo ngaipawimawh em em thin a. Buatsaih a hautakin sum leh pai, tha leh zung a  heh em em a ni. Mahse chuti chungin a buatsaihtu lam hian a tangkaina leh pawimawhzia hriaiin vawi nga (5) lai mazine an lo tichhuak tawh a ni.

Heng souvenir chhuak tawhte hi lehkhabu satliah an ni mai lova, lehkhabu rotling leh belhchiandawl tak tak an ni vek a. Zirlai leh hnam thinlungpu te tan pawh thulakna hnar tling khawp a hnam chanchin leh insuihkhawmna lam te ziak a dahkhawmna a ni a, mite ngaihhlut a hlawh viau zel reng a ni. Chuvangin heng Souvenir tihchhuah tawhte hi a tlangpui thuak chauh ka rawn tarlang duh a, chhiartu ten in tangkaipui ngei ka beisei a.

1. Zofest 2006 khan a vawi khatna ni turin Souvenir tihchhuah a ni a, a hmingah, "INSUIHKHAWM ANG U" tih hman a ni a. He lehkhabu phek 96 a chhah hi MZP General Headquarters leh Mizo Writers' Association te tangkawpin an buatsaih a ni. 

A buaipuitu (Editorial Board) te chu; 

Editor - Pu B.Lalthangliana

Jt. Editor - R.Lalrawna, R.Lallianzuala

Hemi tum hian Gilzom Offset, Electric Veng Aizawlah copy sangkhat (1000) siam a ni a, thuziak pakua (9) bakah message pahnih (2) leh thuhmahruai a awm bawk.

2. Zofest 2009 khan Souvenir siam leh a ni a, a bu hmingah "CHIBAI" tih hman a ni. Chibai-ah hian thuchah (message) pasarih (7), report leh thuhmahruai bakah thuziak tha tak tak sawmhnih pali (24) lai a chuang bawk.

He lehkhabu hi phek 257 laia chhah a ni a, bu sangthum (3000) lai siam niin, Government Press Aizawlah chhut a ni. Chibai hi miin an hlut hle a ni ang, tunah hian a bu hmuh tur a awm mang tawhlo a, chhiar a manhla em em a ni. 

Hetiang khawp a lehkhabu tha leh rotling buatsaihtu te chu tu dng ni lovin; Tv. Lalhruaitluanga Chawngte leh Pu Vanlalremruata Tonson te an ni.

3. Zofest 2012 chu Darchawi, Tripura State chhungah nghah a ni a, hemi tum pawh hian Souvenir buatsaih leh niin, a bu hmingah "INSUIHKHAWM" tih hman a ni. He lehkhabu a kawma Zofate luah chin ram ziarang (Map) chuang hi bu sangthum (3000) lai siam a ni a, Mizoram Government Press-ah chhutchhuah niin, phek 221 laia chhan a ni. A bu chhungah hian thuziak sawmhnih pahnih (22) bakah thuchah (message) pakua (9), report leh thuhmahruai te a awm bawk. 

He lehkhabu ropui leh chhiar manhla tak, lehkhabu rotling ti a sawi reng tawh tur khawr pum a, siamchhuaktu chu; tunlai a zoram kalsiam leh thil nihna tak mipui hriata puanchhuak thintu T.V lama kan lo hmuh fo thin Pu Lalnuntawma Fanai hi a ni.

4. Zofest 2014 chu Assam State chhung, thungpui huan mawi leh zau em em tlan tlang hnu a tlang ram mawi leh nuam em em a awm, an sawi ban theih lohHaflong-ah nghah a ni a.

He hunah hian souvenir tha em em mai, palai te chhiar theih turin tlangzarh a ni a. Chu souvenir chhah leng lawng, belhchian dawl em em chuan "UNAU KAN NI" tih hming a pu a, phek 247 laia chhah niin copy sangli (4000) lai siam a ni a, Bhabani Offset, Guwahati a chhut a ni nghe nghe.

He souvenir-ah hian thuziak sawmthum (30) lai a awm a, chung zing a thuziak pasarih (7) te chu saptawng a ziak a ni. Thuziak bakah hian thuchah (message) pariat (8) leh report a awm bawk. He lehkhabu tha leh manhla tak hi Pu Lalpianfela Chawngthu leh a thawhpui ten rim tak leh hah taka a thawhna zara lo chhuak a ni. 

5. A vawi sarih (7) nan Zofest 2016 chu Mizoram leh Myanmar inrina Tiau bul lawk- Zokhawthar-ah hman a ni a. He hunah pawh hian Zofest souvenir atan lehkhabu buatsaih nise tiin hmalak a ni a. Heng a thu mai a sawi chuan a hlawhtling thei silo a, thu chu tisa a chantir turin Souvenir Sub-Committee hnuaiah hmalakna chak takin a kal chho a, hmangaihna thu leh hla hmanga thalaite mittui lo ti sur tawh thintu MZP chhungkua atangin Pu Hmangaihhlima chu Editor turin mawhphurhna pek a ni a. A thawhrimna leh taihmakna avangin, Zofest 2016 souvenir "RIHLIPUI" tih chu khawr pumin a awm a, Zofest palai zawng zawng ten ro phumruk chhar ang maiin, mahni ipte-ah an ak haw ta fur a ni. 

"Rihlipui" buah hi phek 219  laia chhah a nih bakah, thlalak mitla tak tak a chuang teuh a. Thuziak sawmthum pahnih (32) lai chuangin thuchah (message) pasarih (7) leh thuhmahruai bakah report kimchang tak a chuang bawk. He lehkhabu hi bu sang thum (3000) siam a ni a, M&M Printing Works te chhuttir a ni bawk.

6. Kumin 2018 Zofest Reiek a neih turah pawh hian, Souvenir lehkhabu siam leh ngei tura hmalak chhoh mek zel a ni a. Amaherawh chu kum danga tih ngai loh dan deuhin khawmpui zawh lamah chhuahtir a ni dawn a ni. Zofest 2018 Organising Committee chuan Souvenir Sub Committee a din tawh a, Pu Lalvansanga Pautu MZP Chanchinbu Editor nilai rin tawk takin Committee in Souvenir Editor atan a ruat tawh bawk. 

SOUVENIR SIAM TAWH DAN
KUM	BU HMING	EDITOR	SIAM ZAT	PHEK
2006	Insuihkhawm ang u	B.Lalthangliana	1000	96
2009	Chibai	Lalhruaitluanga Chawngte Vanlalremruata Tonson	3000	257
2012	Insuihkhawm	Lalnuntawma Fanai	3000	221
2014	Unau kan ni	Lalpianfela Chawngthu	4000	247
2016	Rihlipui	Hmangaihhlima	3000	219
2018	Chhinlung	Lalvansanga Pautu	?	?

Compiled by: Chinkhanmanga Thomte,

                       NESO c/m, MZP