ZOFEST 2018 ṬAN A NI TA

ZOFEST 2018 | REIEK

December 4 - 7, 2018

@ZO INPUI

Live Updates @ www.zofest.in

ZOFEST 2018 | REIEK ṭan a ni ta...

Zanin December 4, 2018 zan dar 6:00 khan MZP General Headquarters buatsaih ZOFEST 2018 chu ṭan a ni ta.

He ZOFEST hi a ṭum 8-na niin, Reiek Khawpui leh Mamit district a a thlen ṭum khatna a ni.

Zanin palai lawm inkhawm hi MZP Gen. Hqrs Assistant General Secretary Tv H Lalthianghlima'n a kahruai a.Rev Laldinliana UPC NEI in hunserh hmangin, MZP Gen. hqrs Treasurer Michael Lalramsanga ZOFEST 2018 organising Committee secretary in report a pe a. (Report website ah dah thuai a ni ang.)

MZP General Headquarers Vice presiden B Vanlalana'n Palai lawmna thu sawiin, 'ZOfate insuihkhawm zai rel tura Reiek a lo kalte chunga a lawm thu a sawi.

Hemi zawh hian Kaihpeng hnam atangin chibai bukna ngaihthlak a ni bawk.

Reiek Village Council president Vanlalchhuanga, ZOFEST 2018 Organising Board Reiek Chairman chuan Palai lawman thu a sawi a. Reiek khaw chanchin tlem tarlangin, “ Reiek  chu khaw nuam, khaw bial nia sawi thin a nih thu a sawi a. Reiek hi Lalluaia khua niin, Lalluaia hian Reiek Khaw chung lam zawng zawng humhalhin, Lal ban hnu-ah Village Council in an humhalh chhunzawm ta zel a ni.” a ti.

Reiek tlang tlawh turten a hmuna voluntary a duty tur Reiek Youth Adventure Club te thu ngaichang thiam turin Palai te a ngen a.  ZOFEST 2018 Pandal ‘ZO INPUI’ chu ni sawm chhunga sak zawh a  nih thu a sawi bawk.

Palaite hmel an hmuh a, an hahna zawng zawngte lawmna a chan tak thu a sawi a. Zofate insuihkhawmna a nih dawn phawt chuan mikhual 3000 tal thlen an inhuam thu a sawi a. Palaite chu mahni in a awm anga inngaia tumah inthlahrung lo turin a chah a. ZOfest hi ni thum chhunga ral mai lovin kan haw hnu-ah mi tin thinlung-ah insuihkhawmna leh inlungrualna hi tuh theuh turin Palai kalkhawmte a chah bawk a ni.

Pandal hming inphuahsiak a lawmman latu,  ZO INPUI phuahtu Lalmuanawmi, Pu Laldawngliana fanu hnenah lawmpui thuziak ZOFEST 2018 Organising Board Reiek in an  hlan nghal a ni.

Hrangkhawl Hnam aiawh atangin Chibai bukna ngaihthlak a ni a. Molsom Hnam atangin chibai bukna ngaithlak a ni bawk.

Hun tawp lamah Mizo Zirlai Pawl General Headquarters Adviser F. Lalnienga hnen atangin 'Insuihkhawm leh zai  i rel ang u" tih thupui ngaihthlak a ni.