Zofest chungchangah Press Conference neih a ni

MZP PRESS STATEMENT

1st December, 2018

(L-R) Ricky Lalbiakmawia, NESO Fin. Secy., H.Lalthianghlima, AGS,
L.Ramdinliana Renthlei, President, Michael Lalramsanga Treasurer

Mizo Zirlai Pawl(MZP) chuan Zofa chi peng hrang hrangte kan insuihkhawm a, lungrual taka kan awmho theih hun hi nghakhlel takin a thlir thin a. Zofa chi peng hrang hrangte lungrual taka kan insuihkhawm theih nan MZP chuan nasa taka hma la thinin Zofate kan insuihkhawm theih nana inkhawmpui lian ber ZOFEST chu a tum riatna(8) atan 4th-7th December, 2018 hian Reiek khua Mamit District Mizoram-ah buatsaih a ni leh dawn a ni.

Min awptu ten kan duhdan ni hauh lo a ramri an kham avangin Zofate chu rorelna pakhat hnuaiah awm vek lo mah ila, rilru leh thinlung lamah inpumkhat takin kan awm thei a ni tih hria in MZP chuan ZOFEST a buatsaih thin a. Ramri leh khawsak phung lo dang ta avanga mahni unau, mahni chi pui te ngei pawh inhre tawn tawh lo te huikhawm a thlahkhat unau thisen inzawm kan nihzia hriattir hi ZOFEST thil tum bulpui ber chu a ni a. ZOFEST hi kum 2002, 2004, 2006, 2009, 2012, 2014 leh 2016 ah te khan buatsaih tawh niin Zofa hmun hrang hrang a awm, unau hmel inhai tawhte pawhin unau kan nihzia hre tharin Zofate inkarah ZOFEST hian inunauna chi nung a kui tiak chho zel a. Hei hi MZP chuan lawmawm a tiin Zofa chi peng hrang hrangte kuah khawm a, kan inunauna a that deuh deuh theih nan intawhkhawmna hunpui buatsaih zel hi kan tum a ni.

Zofest 2018-ah hian India ram hmun hrang hrang: Mizoram, Tripura, Manipur, Assam leh Arunachal Pradesh atangte leh Bangladesh leh Myanmar atangin kum dang zawng aia kokimin palai an kalkhawm dawn a ni. ZOFEST palai turte hi Bangladesh atangin Zofa chi peng heng: Miria, Bawm leh Pang te an ni ang a. Tripura atangin Molsom, Kaihpeng, Ranglong, Darlong, Chorai, Hrangkhawl, Bongcher leh Kawrbawng te an ni ang a. Assam atangin Hmar, Biate leh Sakechep an ni ang a. Manipur atangin Gangte, Chiru, Komrem, Aimol, Simte, Zou, Kuki, Paite, Hmar leh Zomi te an ni ang a. Changlang District Arunachal Pradesh atangin Singpho an lokal ang a. Mizoram chhung atangin Paite, Lai, Mara, Pang, Ranglong, Bawm leh Hmar an kal ang a. Tin, Myanmar atangin Chin(Hakha), Tedim, Kachin, Hualngo, Ashu, Tahan Zawlbuk, Tahan Mizo Thalai Pawl leh Chin chi peng hrang hrang te an lo kal dawn bawk a ni.

ZOFEST 2018 ah hian khuallian atan Myanmar atangin Pi Ebenezar Siami(a) Aye Aye Mu, Member of Parliament(MP) Myanmar Sagaing Region, Kalaymyo Constituency, Bangladesh atangin Pu Cross Remliana, Rangamati Hills District Council Bangladesh leh Mizoram atangin Pu Dr. C. Vanlalramsanga, IES Secretary to the Government of Mizoram te an ni dawn a. Tin, ZOFEST min uaptu atan hian Myanmar atangin MP 3 Pu Dr. Riang Vel, Member of Parliament(MP) Myanmar Chin State, Falam Constituency, Pi Ni Sui Lian, Member of Parliament(MP) Myanmar Chin State Hakha, Thantlang Constituency, Nl. Dr. Kyi Moet Moet Lwin, Member of Parliament(MP) Myanmar Mandalay Region, Sintkaing Constituency te beisei an ni  a, Mizoram atangin Pu CL. Ruala MP beisei a ni bawk a ni. Zofest 2018 thupui atan “Insuihkhawm leh zai i rel ang u” tih chu thlan niin thupui hi Professor C. Nunthara leh Rev. Dr. Vanlalchhuanawma ten an sawi dawn a. ZOFEST ah hian Seminar buatsaih a ni ang Dr. C. Lalawmpuia Vanchiau paper buatsaih chu zirho a ni bawk ang. Zofate kan insuihkhawm theih nana buatsaih inkhawmpui lian ber ZOFEST 2018-ah hian Zofate khawvel huapa min ti hmingtha tute Nl. Lalremsiami Hockey player leh Tv. Jeremy Lalrinnunga Weighlifter te chawimawina thuziak hlan an ni dawn a, ZOFEST neih a nih theih nana sulsutu Pu Lalthuthlungliana Manipur chu chawimawina thuziak hlan a ni dawn bawk a ni.

ZOFEST 2018-ah hian Zofa chi peng hrang hrangte’n mahni hnamzia theuh tilang thei tur zai leh lam te an entir bakah chi peng hrang hrangte incheina entir (Costume Parade) a ni bawk anga,  kan unau chi peng hrang hrang atangin mahni hnam infiamna traditional game entir tura beisei a ni bawk a, ZOFEST ah hian ZOFEST Miss leh Mister thlanna neih a ni dawn bawk a ni.  Khawvel hmun hrang hrang a Zofate kan insuihkhawm theih nana buatsaih inkhawmpui lian ber ZOFEST vawi 8-na a tel tur hian MZP General Headquarters chuan Zofa zawng zawngte chu thinlung takin a sawm tak meuh meuh a ni.

Issued by :

Mizo Zirlai Pawl (MZP)

General Headquarters  : Aizawl.