ZOFEST HAWN A NI - MIZORAM CM IN A HMANPUI

Zo hnam inkhawmpui lian ZOFEST 2024 chu "Hrui khat vuanin" tih thupui a hmangin Lalbuanga Rûn-ah, ni 3-6 chhung hian W. Phaileng a neih a ni dawn a, nizan khan hun khatna hman a ni a, MZP President Pu H. Lalthianghlima chuan Zofest meichher a det a ni.

Vawiin ni 4 December (Nilaini) chawhma dar 11:00 khan hun hnihna hman niin, he hunah hian Pu Lalduhoma, Chief Minister chu Khuallian niin, Pu C. Lalremruata, Vice President MZP kaihhruainain hun hman a ni.

He hunah hian MZP President Pu H. Lalthianghlima chuan thu sawiin, Zofest hi kum 2002 atanga hman tan tawh niin, he hun hi zofa hmun hrang hranga awm te kan insuihkhâwm zual zel theihna tura hman thin a ni a, harsatna leh buaina tam tak karah ZOFEST hi hman thin a ni a, kumin Zofest vawi 10na pawh hi harsatna tam tak paltlang a hman mek a ni.

MZP President chuan, "Zofa hnam chi peng hrang hrang te hi Mizoram chhung leh pawnah tam tak kan awm a, kan awmna hmun theuhah hian kan dingchhuak vek thei a ni" a ti.

Chief Minister chuan, Zofest Souvenir, Zawlbuk a tlangzarh zawhah thu sawiin, MZP hian Mizorama politician eiru lo berah min lo thlang tawh a, remna leh muanna a awm theih nana ka lo thawh ve ang ang teah min lo chawimawi tawh bawk. In zinga tel hi nuam ka ti a, in sawmna pawh hi ka pawm leh mai thin. Kawng tam takah MZP nen ram leh hnam tan hna kan thawkho mek a, kan hruaitute an felin an huaia, "Thil dik lo siamtha tura hma in laknaah sawrkar mitmei veng vak suh u, tiin ka lo chah mai thin", a ti.

Zofate kan tam a ngai a, fa kan ngah deuh deuh a tul. Kan ram hi ram dangte nena khaikhin chuan density of population a la hniam a, mihring tam zawk chenna tur ram kan la nei a ni. Pun hi kan sawrkar policy a nih avangin nupa, fa pathum leh a aia tam nei chinte hamthatna duan hial kan rilruk.

Zofate kan inpumkhat deuh deuh tih kan hmu. Mipuite chauh kan inpumkhat lo va, kohhran thlengin kan inpumkhat deuh deuh a ni. Hman ni lawk khan Mizoram Council of Churches din a ni a, kar hmasa mai khan International Chin Christian Youth Conference, Lawngtlaiah ka va hmanpui a, Lawngtlai district-a kohhran pahnih inzawmkhawm LIKBK ten an inpumkhatna silver jubilee an lawm bawk a, "USA ah zo hnahthlak kohhran hrang hrang pakua ten zofate inpumkhatna lama hma la turin an intelkhawm ta bawk a ni" a ti.

Zofest 2024 Organising Secretary, Pu Chinkhanmanga Thomte, hnen atang report ngaihthlak a ni a, Pu Evan V.L Hruaisang'n hunserh hmangin, Chin Baptist Church, USA, Myanmar MP leh Thangram Indegenous People Movement atangin thusawi ngaihthlak niin, zofa hnam chi peng hrang hrang atang zai leh lam hmuhnawm tak en a ngaihthlak a ni bawk.

Zofest 2024 ah hian, Myanmar, Manipur, Assam, Bangladesh, Tripura, Assam leh USA atang te in palai an rawn kal a ni.