ZOFATE INPUMKHAT NAN TAWNGKAM HMAN FIMKHUR A PAWIMAWH- PROF LALNILAWMA

Vawiin ni 5 December, 2024 (Ningani) chawhma dar 11:00 khan Zo hnam inkhawmpui lian ZOFEST 2024 ni hnihna hun W. Phaileng-ah hman chhunzawm a ni a. Prof. Lalnilawma Minister of State chuan khuallian niin a hmanpui. 

Khuallian-in thu a sawi bakah, Pu Lalmuanpuia Adviser to Chief Minister (Political)-in Zofest 2024 thupui "Hrui khat vuanin" tih a sawi a. Hnam hrang hang aiawh an zai bakah an hnam lam an entir a. Chawhnu lamah thupui sawihona hun hman niin, Pu Chinkhanmanga Thomte, MZP General Secretary-in hun a kaihruai. 

He hunah hian, Manipur a chi leh chi inkara buaina avanga Zofa Unau Pasaltha boral mi 12-te sûnna hun hman niin, ngawi rengin minute khat an ding.

He hunah hian khuallian Prof. Lalnilawma chuan thusawiin; Zofa hnam chi peng hrang hrangte hi kan inpumkhat zel theih nan, kan inunauna ti chhe thei zawnga tawngkam hman hi a pawi thei hle a, kan in unauna tih ngheh zel a nih theih nan kan tawngkam hman kan fimkhur a ngai a ni a ti. 

Khuallian chuan, Zofa chi peng hrang hrangte hian keimahni awmna hmun (area) theuhah kan hnam bil politics kan khelh nat lutuk avang hian kan in lungrual lo fova, hnam bil dinkhawchhuahna aiin, Zo Hnam anga kan dinkhawchhuahna tur buaipui ila kan inlungrual ang a ti. 

He hunah hian, Pu Lalmuanpuia Punte, Adviser to CM (Political) chuan, "hrui khat vuanin" tih thupui sawiin, "Zofaten kil hrang hrang atangin beih kan tawk nasa hle a, hetiang hi kan dinhmun a ni chung pawha kan in lungrual hlei thei lo hi chu a hahthlak hle a. Hrui khat kan vuana, kan tanrual vat lo a nih chuan kan darh vat ang" a ti. 

Pu Muanpuia chuan, Zofate hi kan awmna hmun a zira koh dan hnam hming hrang hrang nei kan ni a. Zo hnam hi kan inlungrualna ber nia a lan avangin, i tangrual zel ang u a ti. 

Chawhnu lamah, Zofest thupui sawihona "Pûm titi" neih niin, Zofate inlungrualna tur leh hrui khat vuana thawhho dan tur sawiho a ni a. Zofest palai hrang hrangten sawihona an nei a. Hetiang hian thurolum an siam:-

1. India, Burma, Bangladesh leh ram hrang hranga Zofa awmte hi thisena unau, thlah khat kan ni a. Ramriin min thendarh mahse hnam nunphung inang, ze inang, rinna thuhmun kan ni. 

2. Vawiinah hian ramriin min thendarh rih mahse, engtik niah emaw chuan ram rorelna pakhat hnuaiah kan la awmkhawm ang tih kan ring tlat a ni.  

3. Zofate tuna kan awmna ram theuhah, khua leh tui ṭha ni turin kan infuih a. Harsatna leh buaina kan tawh hunah inpuih tlan zel tha kan ti. 4. MZP-in Zofate kan insuihkhâwm theih nana a hmalakna hi kan thlawp a, theih ang angin kan ṭawiawm zel ang.